لو لفيتوا النت كله ولو بحثتم في جميع كتب التاريخ الإنساني
من بدايته ولحد دلوقتي مش هتلاقوا ست أعظم واقوي من
صاحبة الجلاله والمقام الرفيع ،
سيدة الارض المبجله الملكه ( اياح حتب )
وابنتها صاحبة العزم والقوه و المحبوبه من جموع الشعب ( احمس نفرتاري )
اللتان لم تلد الأرض مثلهن ابد الدهر
- ايييييييه ياعم الأوفر ده.!!!
مين دول يعني ؟!!
اقولك انا مين دول :
نرجع مع بعض كده لعهد الملك (سقنن رع) بطل من أبطال مصر
وصاحب اول شرارة نضال وكفاح ضد الهكسوس،
زوجته كانت ( اياح حتب ) اللي مكانتش مجرد زوجه ملكيه عاديه،
كان ليها دور أكبر من كده بكتير.. الموضوع بيبدأ لما ملك الهكسوس
قرر يبعت رساله للملك (سقنن رع) بيقوله فيها ان صوت افراس النهر في (طيبه) تزعجه في (اواريس) اللي المسافه بينها وبين طيبه اكتر من الف كيلو متر، ويطلب منه انه يموتها أو يجي هو يموتها بنفسه طبعا الهدف واضح وهو الاستهزاء ب (سقنن رع) اللي كان بيجهز جيشه لبدأ الكفاح ضد الهكسوس ، يجي هنا دور العظيمه ( اياح حتب ) اللي وقفت جنب جوزها وساندته وشجعته اكتر ان يكون اول من يجاهد لتحرير الأرض، خلقت روح الوطنيه في قلوب المصريين،
كانت بتزل وتمشي في وسط الجنود وتشعل في قلوبهم الحماس وحب الوطن وتشجيعهم علي التضحيه من أجل مصر، وتشرف علي تدريباتهم العسكريه وتنظم صفوف الجيش مع القاده،
الملكه نفسها تنزل الشوارع وتلف علي الناس وتشجعهم عالتجنيد في الجيش اللي هايحرر مصر في حرب الشرف واسترداد الكرامه، وبنتها ( احمس نفرتاري ) معاها وتؤازرها وتتعلم منها ازاي تقدر تشعل حماسة الجنود، ازاي تقدر تقف جنب الستات اللي رجالتهم بيستعدوا للحرب، ازاي تصبر كل زوجه علي فراق زوجها ، ازاي تقدر تحول قلق الزوجات الي حماس وطني يخليهم يشجعوا رجالتهم علي الانضمام لصفوف الجيش،
وقد كان.. وبدأت الحرب ضد الهكسوس وبدأت معركة الشرف،
ويستشهد العظيم سقنن رع بضربة بلطه غادره في راسه جعلته اول شهداء الوطن في معركة استرداد الكرامه.
بس ده ما احبطش العظيمه اياح حتب رغم فيضان الحزن اللي كان بيجري في روحها وقدرت تتمالك نفسها بقوه وعزيمه رهيبه، وقدرت تجمع صفوف الجيش وتشارك في تسيير الفرق العسكريه وترجع الجنود اللي تملكهم الخوف والرهبة بعد استشهاد ملكهم بعد ما كانوا انسحبوا من صفوف الجيش واعتنت بيهم وتؤدي معاهم الشعائر الدينية، وطردت المتمردين اللي كانوا بيزرعوا روح اليأس في الجيش، ودفعت بإبنها كامس - اللي أصبح الملك بعد استشهاد ابوه- لقياده الجيش تاني والخروج لاستكمال حرب استرداد الكرامه وقد كان،
خرج الملك كامس علي رأس جيشه لخوض الحرب المقدسه ولتحرير ارض مصر وقدر يحقق انتصارات كبيره علي الهكسوس وقدر يسترد معظم المدن اللي كانت تحت احتلال الهكسوس وكان خلاص قاب قوسين أو أدنى من الانتصار لكنه وللأسف بعد ٣ سنين من الحرب والنضال أستشهد في ارض المعركه زي ابوه،
بطل ابن بطل
ويجري شلال الحزن تاني في روح ووجدان العظيمه اياح حتب، وتؤازرها بنتها العظيمه احمس نفرتاري اللي كانت بجانب امها وشريكتها في النضال .
طب كده يا جدعان الست دي جوزها أستشهد وابنها كمان أستشهد
تسكت وتحبط وتسيب الحزن يتملكها ؟!!!
لا، مفيش الكلام ده حضرتك، اياح حتب وبنتها احمس نفرتاري كتبتوا درس في العزيمه والإصرار والإراده الفولاذية لكل نساء العالم، فدفعت بإبنها الأصغر احمس الي الحكم وكانت وصيه عليه وجوّزته بتها احمس نفرتاري اللي قامت بنفس دور امها في معركة الشرف وحرب النضال والتحرير، بنت زي امها بالظبط قويه بعزيمه صلبه وقلب شجاع وقفت جنب جوزها احمس لحد ماقدر يحرر مصر من الهكسوس وطردهم نهائيا من مصر وللابد.
العيله دي من اشرف واقوي من انجبت مصر واكتر عيله روت بالدماء ارض مصر،
اياح حتب أعظم نساء التاريخ الإنساني..
اياح حتب ضحت بكل عزيز وغالي من أجل مصر
اياح حتب شاركت الجيوش احزانهم وافراحهم
اياح حتب رَفعت الروح المعنوية لكل جندي
اياح حتب كانت سند جوزها لحد ماستشهد
اياح حتب كانت سند ولدها لحد روي بدمه ارض مصر
اياح حتب ماستسلمتش وزرعت في بنتها روح النضال والإراده، واستحقت بجداره ماكتبه عنها ابنها احمس علي جداريه في معبد الكرنك قائلاً:
إمدحو سيدة الارض، سيدة جزر الحاونبو -البحر المتوسط-، ذائعة الصيت في كل بلد اجنبي، هي التي تضع الخطط للناس، زوجة الملك فلتعش سليمه معافه، ابنة الملك، ام الملك النبيله، العالمة التي تعرف الأشياء، التي ترعي امور مصر والتي اهتمت بأمر جيشها و وضعته تحت رعايتها، هي التي أعادت الهاربين وجمعت الفارين، هي التي هدأت الجنوب واخضعت ثائريه، زوجة الملك، اياح حتب فلتحيا.
ومن بعدها كانت احمس نفرتاري تخطو علي خطي امها، الاتنين دول سابو أثر كبير في قلوب شعب مصر وصلت لدرجة التقديس.
العيله دي يا جماعه ينطبق عليهم جملة
-في ناس ماتت بلا زفه وسابت مصرنا واقفه ولو يتحط في الكفه بطل منها بجيش كامل-
لكي يا سيدتي الملكه كل الحب والتقدير
ولكي يا مصر السلامه وسلاما يا بلادي
